Shpërthimi i rasteve të shumta me koronavirus këtë muaj ka trembur gjithë europianët dhe ka vënë në lëvizje qeveritë e shteteve, një pjesë e të cilave u janë drejtuar sërish masave ekstreme të izolimit.
Por për vende si Gjermania, ku qeveria nuk do të nxitohet me ashpërsimin e masave, më shumë se çdo gjë nga qytetarët kërkohet kujdes dhe disiplinë.
Kancelarja, Angela Merkel, shprehu gjithë shqetësimin e saj për zhvillimet e pandemisë në një video-konferencë me udhëheqësit rajonalë të Unionit Kristian- Demokratik të Gjermanisë (CDU).
Në deklaratën e saj, ajo i ka bërë thirrje qytetarëve se duhet të vazhdojnë të respektojnë rregullat në mënyrë që gjithçka të shkojë mirë.
“Kemi muaj shumë, shumë të vështirë përpara nesh. Unë nuk kam një parandjenje të mirë. Nuk mund të vazhdojmë kështu. Duhet disiplinë, disiplinë, disiplinë!”,- ka thënë ajo.
Ndërkohë, Gjermania gjatë 24 orëve të fundit ka shënuar mbi 9829 njerëz të infektuar dhe shifra në total është 437,637 persona. Ndërkohë kanë ndërruar jetë mbi 27 pacientë dhe numri në total është 10,138.
/GazetaReforma.com/
