Ditën e sotme policia e Durrësit ka nxjerrë njoftimin lidhur me një ngjarje të ndodhur paraditen e sotme, ku shtetasi A.M 48 vjeç ka kallëzuar se disa persona kishin hyrë në banesën e tij dhe nuk pranonin të dilnin jashtë.
Sipas njoftimit, në momentin që punonjësit e policisë ishin paraqitur në vendngjarje rezultoi që personat të cilët kishin hyrë brenda shtëpisë së 48 vjeçarit ishin gazetarë të një emisioni investigativ, të cilët pretenduan se ishin kanosur dhe ofenduar nga ana e shtetasit A.M.
Gazetarët janë larguar nga shtëpia e 48 vjeçarit pa pranuar të bënin një kallëzim penal.
Njoftimi i Plotë nga Drejtoria Vendore e Policisë Durrës:
Më datë 22.03.2022, është marrë njoftim se rreth orës 10:00, në vendin e quajtur “Ura e Tanës”, Manëz, Durrës, kishte ndodhur një konflikt.
Shërbimet e Policisë shkuan menjëherë në vendngjarje dhe nga kryerja e veprimeve të para hetimore rezultoi si më poshtë:
Shtetasi A. M., 48 vjeç, banues në Sukth, Durrës, ka kallëzuar se në pronën e tij ka konstatuar 3 persona të panjohur që kishin hyrë brenda pronës dhe nuk pranonin të dilnin.
Nga verifikimet paraprake rezultoi se ata ishin gazetarë të një emisioni investigativ.
Gazetarët kanë pretenduar se janë kanosur dhe ofenduar nga shtetasi A. M., por edhe pas insistimit të punonjësve të Policisë, se duhet të bënin kallëzim për pretendimet e tyre për kanosje, ata nuk kanë pranuar të bëjnë kallëzim dhe janë larguar, duke u shoqëruar nga punonjësit e Policisë, deri në rrugën nacionale.
Në përfundim të veprimeve të para hetimore, materialet i kaluan Prokurorisë së Rrethit Gjyqësor Durrës, për veprime të metejshme.
