Gjykata e Fierit ka vendosur masën e sigurisë “arrest në burg” për Ledjan dhe Klaudio Kapllanaj, si dhe Gerald Kollçakun. Ata akuzohen për dhunë ndaj një agjenti të Byrosë Kombëtare të Hetimit dhe efektivëve të Forcës së Posaçme Operacionale, ndërsa këta të fundit po kryenin veprime hetimore në kuadër të një dosjeje të SPAK.
Ngjarja ka ndodhur në aksin rrugor Fier–Patos, pranë fshatit Portëz e Madhe, ku agjentët ndodheshin për një operacion hetimor. Sipas njoftimit të prokurorisë, ata janë filmuar në vendngjarje nga Orjan Isufaj, drejtues i një kompanie që i përket vëllait të ish-kryebashkiakut të Mallakastrës, Agron Kapllanaj.
Rreth 30 minuta më vonë, ndërsa agjentët ishin të ndalur në një tjetër vend përgjatë rrugës, pranë rrethrrotullimit të parkut në Fier, tre automjete iu afruan dhe nga to zbritën disa persona, të cilët, sipas prokurorisë, ushtruan dhunë fizike ndaj hetuesve dhe efektivëve të policisë, pavarësisht se këta të fundit ishin prezantuar si punonjës të ligjit.
Ish-kryebashkiaku Agron Kapllanaj ka mohuar akuzat ndaj të afërmve të tij, duke pretenduar se dhuna ka ardhur nga ana e agjentëve dhe policëve, të cilët, sipas tij, nuk janë identifikuar dhe kanë nxjerrë armët në mënyrë të pajustifikuar, duke ofenduar e kërcënuar palën tjetër.
Ndërkohë, hetimet për këtë ngjarje vijojnë, ndërsa autoritetet janë duke verifikuar të gjitha rrethanat përmes dëshmive dhe pamjeve filmike të siguruara.
