Rastet e dhunës në kopshte ndaj fëmijëve nuk kanë të ndalur. Sot raportohet se një edukatore në një kopsht publik në Elbasan është vënë nën hetim nga policia. Ajo dyshohet se ka dhunuar një fëmijë me autizëm.
Policia e Elbasanit në një deklaratë në rrjetet sociale është shprehur se edukatorja 57-vjeçare me iniciale O.B., dyshohet se ka keqtrajtuar 5-vjeçarin. Gjithashtu njoftohet se po kryen procedurat e nevojshme për të zbardhur rrethana të reja lidhur me këtë ngjarje.
“Specialistët për Hetimin e Krimeve të Komisariatit të Policisë Elbasan referuan materialet në Prokurori ku nisi procedimi në gjendje të lirë për shtetasen O. B., 57 vjeçe, banuese në Elbasan, me profesion edukatore në një kopsht publik, pasi dyshohet se ka keqtrajtuar një 5-vjeçar që vuan nga Autizmi. Shërbimet e Policisë po kryejnë të gjitha veprimet e nevojshme procedurale dhe hetimore për të zbardhur rrethanat e rastit”, njofton policia.
