Anëtarët e forcës policore kombëtare të Kolumbisë që janë përgjegjës për abuzime ose akte dhune në mes të protestave të vazhdueshme do të ndëshkohen në masën e plotë të ligjit, tha kreu i policisë.
Demonstruesit dhe grupet e të drejtave të njeriut kanë akuzuar vazhdimisht oficerët e policisë për vrasjen e civilëve, përdorimin e tepruar të forcës, abuzimin seksual dhe përdorimin e armëve të zjarrit, si gjatë protestave aktuale dhe atyre të mëparshme. Akuzat për abuzim të mundshëm të një të mituri në qytetin Popayan kanë shkaktuar protesta të dhunshme atje këtë javë, shkruan Reuters.
“Ata duhet të përgjigjen para autoriteteve dhe kushdo që me vetëdije ka kryer një krim; përgjigjja do të ketë peshën e plotë të ligjit,” i tha Reuters në një intervistë drejtori i policisë kombëtare Jorge Luis Vargas.
“Ne jemi të parët që hedhim poshtë sjelljen e paligjshme nga një oficer dhe do të kërkojmë falje kur të ketë një vendim gjyqësor,” tha Vargas.
Vargas tha se 122 procedime disiplinore janë hapur kundër policisë që nga fillimi i protestave muajin e kaluar, ndërsa tre janë arrestuar me akuza vrasjeje të lidhura me vdekje civile.
“Nuk mund të ketë, nuk duhet të ketë dhe nuk do të ketë pandëshkueshmëri,” tha veterani i policisë.
Oficerët e akuzuar do të kenë procesin e duhur, tha ai, duke shtuar se policët kanë qenë gjithashtu viktima të agresionit fizik, sulmeve të armëve të zjarrit dhe një incidenti ku një turmë i vuri flakën një stacioni. Një oficer policie ka vdekur dhe gati 900 janë plagosur.
Policia që ka ndërhyrë për të kontrolluar plaçkitjen dhe vandalizmin gjatë protestave nuk ka përdorur armë zjarri, tha Vargas. Në vend të kësaj, armët jo vdekjeprurëse përdoren sipas rregullave kombëtare dhe ndërkombëtare. Grupe si Human Rights Ëatch thonë se keqpërdorimi i armëve jo vdekjeprurëse mund të çojë në vdekje.
Protestuesit, të cilët fillimisht thirrën marshime kundër një plani taksash tashmë të anuluar, kanë zgjeruar kërkesat për të përfshirë të ardhurat bazë, fundin e dhunës policore dhe mundësitë për të rinjtë, ndër të tjera. Numri i të vdekurve të protestave është i diskutueshëm. Avokati i Popullit për të drejtat e njeriut po heton 41 vdekje civile, ndërsa zyra e prokurorit të përgjithshëm ka konfirmuar 14.
