Policia e Krujës ka arrestuar Ariel Rrajën, nipin e ish-deputetit socialist, Rrahman Rraja, dhe djalin e Flamur Rrajës.
Ariel Rraja u arrestua ditën e djeshme dhe ishte në kërkim për dhunën që ushtroi së bashku me babain e tij, Flamur Rrajën, ndaj Kujtim Cacës dhe të birit. Ngjarja ndodhi në tetor 2024, pas një konflikti që kishte shpërthyer ndërmjet Flamur Rrajës dhe Kujtim Cacës për një kanal.
Arjel Rraja, i cili ka qenë më parë i ndaluar për shitje të lëndëve narkotike, kokainë, është arrestuar dhe Gjykata e Tiranës i ka caktuar masën e sigurisë “Arrest në burg”. Ai është nën hetim për veprën penale “Largimi i të burgosurit nga vendi i qëndrimit”.
“Specialistët e Seksionit për Hetimin e Krimeve të Komisariatit të Policisë Krujë ndaluan shtetasin e shpallur në kërkim A. Rr., 24 vjeç, të cilit Gjykata e Tiranës i ka caktuar masën e sigurisë “Arrest në burg”, për veprën penale “Largimi i të burgosurit nga vendi i qëndrimit”. Në vijim të veprimeve për këtë rast, janë proceduar penalisht shtetasit F. Rr., 56 vjeç dhe E. T., 26 vjeç, pasi kanë kundërshtuar punonjësit e Policisë, gjatë ndalimit të 24-vjeçarit, dhe nuk iu janë bindur urdhrit të tyre, për shoqërimin në komisariat.”, thuhet në njoftimin e policisë.
Gjithashtu, Flamur Rraja ishte i përfshirë në dhunën ndaj vëllezërve Bilbil dhe Jashar Maja, ngjarje që u bë e njohur pas publikimit të një videoje ku ai mbante në dorë një pistoletë. Dhuna e ushtruar ndaj vëllezërve Maja shkaktoi reagime të forta, dhe pas këtij incidenti, Rrahman Rraja, baba i Flamurit, dorëzoi mandatin e tij si deputet.
Ngjarja e dhunshme ndodhi më 6 korrik 2023, kur fisi Rraja ushtruan një dhunë të pamëshirshme ndaj banorëve të Borizanës, të cilët kishin denoncuar në Policinë e Fushë Krujës dhe ishin mobilizuar me protesta. Ata kundërshtuan aktivitetin e një guroreje, e cila ndodhej në pronësi të Përparim Rrajës, kushëririt të ish-deputetit socialist Rrahman Rraja, dhe po shkaktonte dëme të mëdha në shtëpitë e tyre.
Kushërinjtë Bilbil dhe Jashar Maja u goditën dhe u kërcënuan me armë nga anëtarë të familjes Rraja, përfshirë djali i ish-deputetit Rexhep Rraja, si dhe vëllezërit Flamur dhe Xhelal Rraja, Përparim Rraja, Klajdi Rraja dhe Edison Meta.
