Dhoma Amerikane e Tregtisë në Shqipëri (AmCham) ka ngritur një alarm të fortë për funksionimin e platformës e-Albania, duke paralajmëruar rreziqe serioze për ekonominë, bizneset dhe sigurinë kombëtare.
Në deklaratën e saj, AmCham vlerëson digjitalizimin e shërbimeve publike si një hap pozitiv, por thekson se problemet e përsëritura teknike, mungesa e auditimit të pavarur dhe standardeve të forta të sigurisë po e kthejnë e-Albania-n nga një lehtësi në një kërcënim real për aktivitetin ekonomik.
Sipas raportimeve të anëtarëve të AmCham, shërbime të rëndësishme të platformës shpesh nuk funksionojnë, bllokohen në orare piku, kanë vonesa dhe performancë të paparashikueshme. Kjo situatë, sipas Dhomës, po paralizon aktivitetin e bizneseve, duke i penguar ato të përmbushin detyrimet ligjore, fiskale dhe administrative.
Shqetësimi lidhet edhe me rolin e Agjencisë Kombëtare të Shoqërisë së Informacionit, pasi problemet e vazhdueshme teknike dhe mënyra e menaxhimit të sistemeve TIK po rrisin rrezikun për keqmenaxhim dhe ekspozim të të dhënave shumë sensitive, përfshirë të dhëna personale, pasurore dhe informacion kritik shtetëror.
AmCham nënvizon se në vendet e zhvilluara, sistemet digjitale qeveritare i nënshtrohen kontrolleve strikte sigurie, auditimeve të rregullta dhe procedurave transparente të prokurimit, gjë që sipas saj mungon ose nuk zbatohet plotësisht në Shqipëri.
Në këtë situatë, Dhoma Amerikane e Tregtisë i bën thirrje Qeverisë të ndërhyjë urgjentisht për të garantuar funksionim të qëndrueshëm të e-Albania-s, auditime të pavarura të sigurisë kibernetike, transparencë në prokurime dhe njoftim të detyrueshëm për çdo ndërprerje shërbimi.
Sipas AmCham, pa këto masa, digjitalizimi rrezikon të kthehet nga një histori suksesi në një faktor destabilizues për ekonominë dhe sigurinë e vendit.
