Dhimbja tashmë është e dyfishtë në familjen e poetit shqiptar Arben Duka. Pasi Duka humbi jetën në muajin dhjetor, ditën e sotme të njëjtin fat ka pasur edhe djali i tij 35-vjeçar.
Denis Duka, i biri i poetit të njohur ka ndërruar jetë në Shtetet e Bashkuara të Amerikës për shkak të një infarkti, njëlloj si i ati i tij.
Denis Duka ishte i martuar, kishte një vajzë dhe jetonte prej vitesh në SHBA.
Lajmin e kanë bërë të ditur miqtë e tij të shumtë në rrjete sociale.
Kujtojmë që Arben Duka në Labovë të Gjirokastrës. Mbaroi Akademinë Ushtarake dhe Universitetin “Aleksandër Xhuvani”. Është një ndër letrarët, e biografinë më të pasur letrare dhe artistike në vend. Është autor i mbi pesëdhjetë vëllimeve poetike të botuara e të ribotuara deri në pesë herë. Është bashkëautor në rreth tre mijë këngë të të gjitha zhanërve duke filluar qysh nga viti 1974. Ka dhjetra çmime si autor dhe bashkëautor në gjininë e këngës, ku spikasin shtatë çmime të para në Festivalet Kombëtare të këngës në Radiot Televizionin Shqiptar. Është autor i mijëra e mijëra vargjeve humoristik dhe satirikë në shumë të përditëshme dhe periodike. Ka mbuluar për rreth shtatë vjet “Intervistat e Kaso Kosës” në gazetën “Intervista” duke qënë i spikatur dhe në prozë në këtë fushë. Por Duka është më së shumti një poet lirik.
Duka sot është poeti më i lexuar dhe më i komentuar ndër shqiptarë. Ai, me stilin dhe talentin e tij ka arritur ta mbrojë me dinjitet të drejtën e të vërtetën.
Puna e tij e përkushtuar dhe kontributi që i ka dhënë letërsisë shqipe në përgjithësi, është për t’u çmuar dhe për t’u përshëndetur.
