Një sulm me hark dhe shigjeta, në të cilin një danez i konvertuar në Islam dyshohet se vrau pesë persona në një qytet norvegjez duket se ishte një akt terrorist, tha policia të enjten.
Hetuesit e identifikuan të dyshuarin si Espen Andersen Brathen, një 37-vjeçar që jetonte në komunën Kongsberg, ku u kryen sulmet të mërkurën në mbrëmje.
Një avokat policie i tha Reuters se Braathen kishte pranuar vrasjen e viktimave. Avokati i tij konfirmoi vetëm se Brathen po bashkëpunonte me policinë dhe po jepte një deklaratë të detajuar. Policia ishte e shqetësuar për shenjat e radikalizimit tek i dyshuari para sulmeve, të kryera me hark dhe shigjetë dhe armë të tjera, tha një oficer i lartë.
Flamujt u valëvitën në gjysmështizë nëpër Kongsberg pas vdekjes së katër grave dhe një burri, të gjithë të moshës 50-70 vjeç. Tre të tjerë, përfshirë një oficer policie jashtë detyrës, u plagosën.
Banori i Kongsberg, Markus Kultima, 23 vjeç, i cili punon në një dyqan birre, ishte dëshmitar i pjesëve të sulmit.
“Pashë një burrë që vinte duke ecur me një shigjetë në shpinë”, tha Kultima për Reuters. Ai tha se ishte oficeri jashtë detyrës ai që i tha të shkonte në shtëpi.
“Më duhej të ecja në drejtimin nga erdhi ai djalë”, tha Kultima, duke e përshkruar këtë si “shumë të rëndë “.
Policia tha se besonte se Brathen kishte vepruar vetëm. Një gjykatë do të vendosë të premten për sa kohë policia mund ta mbajë atë në paraburgim.
“Ngjarjet në Kongsberg për momentin duken si një akt terrorist”, tha policia e sigurisë PST në një deklaratë, duke shtuar se hetimi do të përcaktonte motivin.
Shefi i policisë rajonale Ole Bredrup Saeverud tha se i dyshuari ishte konvertuar në Islam.
“Policia ka qenë më parë në kontakt me personin në lidhje me problemet e lidhura me radikalizimin. Ne nuk kemi regjistruar asgjë në lidhje me të në vitin 2021, por më pare”, tha Saeverud në një konferencë shtypi.
