Policia ka ngritu një pistë tjetër hetimi në lidhje me shpërthimin e tritolit mëngjesin e kësaj të hëne në qytetin bregdetar të Sarandës. Burime për BalkanËeb tregojnë se hoteli i cili u rrafshua nga plasja e disa kilogramëve tritol ka qenë në tentativë për t’u blerë Edmond Papa, i cili u ekzekutua më pas me armë zjarri në një atentat teksa po hynte në një lokal në Tiranë.
Ndonëse mësohet se ekziston mundësia e kësaj piste, e cila bën bashkë shumë krime të ndodhura muajt e fundit përfshirë edhe vrasjen e të riut Aleksandër Sadikaj në mbikalimin pranë TEG-ut. Kujtojmë se ky i fundit u ekzekutua përmes një atentati me eksploziv dhe mendohet se porositës ka qenë Papa, i cili dyshohet se është ekzekutuar nga një mik i Sadikajt që është arrestuar nga policia.
Grupi hetimor tregohet i rezervuar për të dhënë detaje të mëtejshme për këtë pistë, ndërkohë që nuk dihet se me kë nga ortakët po zhvilloheshin këto tratativa blerje dhe si kanë përfunduar. Sipas hetimit paraprak të xheniereve dyshohet se sasia nuk ishte vendosur në një vend, por në disa pjesë të hotelit dhe është vendosur në mënyrë të tille që forca goditëse ta rrafshonte godinën duke shpërthyer në seri të gjitha sasitë e tritolit të vendosura në objekt.
