Seanca konstituive e Kuvendit të Kosovës u ndërpre sërish, pasi mungoi konsensusi mes partive politike.
Kryesuesi i seancës, deputeti i zgjedhur nga Lëvizja Vetëvendosje, Avni Dehari, bëri të ditur se përpjekjet për dialog mes grupeve parlamentare nuk prodhuan marrëveshje.
“Në konsultimet paraprake me përfaqësuesit e partive politike nuk u arrit konsensus. Takimi vetëm sa konfirmoi qëndrimet e ndara, ndërkohë që disa përfaqësues zgjodhën të braktisin bisedimet. Seanca do të vijojë brenda 48 orëve, të premten më 19 prill, në orën 12:00, me shpresën se deri atëherë do të ketë pajtim”, deklaroi Dehari.
Seanca e parë, e nisur të martën, përfundoi menjëherë pas votimit të raportit të komisionit të përkohshëm për verifikimin e kuorumit dhe mandateve me 52 vota pro, 46 kundër dhe 11 abstenime dhe që prej asaj dite nuk ka pasur përparim në konstituimin e plotë të Kuvendit.
