Seanca e parashikuar për këtë të martë në Gjykatën e Posaçme kundër Korrupsionit dhe Krimit të Organizuar, ku do të duhej të vijonte dëshmia e të penduarit të drejtësisë, Erjon Alibej, është shtyrë për shkak të mungesës së tre avokatëve mbrojtës.
Përballë kësaj situate, Prokuroria kërkoi marrjen e masave administrative ndaj avokatëve, duke i cilësuar mungesat e tyre si të pajustifikuara dhe një pengesë serioze për vijimin e gjykimit.
Seanca e radhës u caktua për ditën e enjte, më 5 qershor.
Erjon Alibej, i cilësuar si drejtuesi i një prej grupeve më të rrezikshme kriminale në Elbasan, është nën akuzë për trafik ndërkombëtar droge dhe urdhërimin e disa atentateve për motive hakmarrjeje.
Ai ka pranuar të bashkëpunojë me drejtësinë dhe javën e kaluar nisi rrëfimin e tij para trupës gjykuese. Në dëshmi, Alibej foli për aktivitetin e tij në trafikun e kokainës dhe për marrëdhëniet me figura të botës së krimit.
Ai përmendi përplasjet me vëllezërit Franc dhe Hajdar Çopja, si dhe Suel Çelën, me të cilët më parë kishte pasur lidhje miqësore.
Alibej akuzoi vëllezërit Çopja si të përfshirë në vrasjen e vëllait të tij, Endrit Alibej, në ngjarjen e njohur si “Masakra e Bradasheshit” që ndodhi në vitin 2020, ku u vranë edhe Arben Dylgjeri dhe shtetasi turk Erdal Durunay.
