Për të 22-tën herë me radhë, Kuvendi i Kosovës ka dështuar të konstituohet, pavarësisht zgjedhjeve të mbajtura më 9 shkurt. Seanca e sotme përfundoi pa arritur kuorumin e nevojshëm për ngritjen e Komisionit të Mbikëqyrjes për një votim të fshehtë – vetëm 54 deputetë votuan pro, ndërsa duhej një minimum prej 61 votash. Një deputet votoi kundër dhe nuk pati asnjë abstenim.
Menjëherë pas këtij dështimi ka reaguar Kryeministri në detyrë i Kosovës, Albin Kurti. Ai u shpreh se ndryshe nga formimi i Qeverisë, i cili është përgjegjësi e partisë fituese, konstituimi i Kuvendit është detyrë e të gjithë deputetëve.
“Kosova ka qeveri në detyrë, unë jam kryeministër në detyrë. Ajo që i ndihmon Kosovës është Kuvendi i ri i Republikës. Kuvendin nuk e konstituon fituesi, por të gjithë. Si fitues të zgjedhjeve me 48 deputetë dhe me 9 deputetë të pakicave që na janë bashkuar, e kemi përgjegjësinë për ta formuar qeverinë. Pra, fituesi e ka përgjegjësinë për formimin e qeverisë. Ndërkaq, për ta konstituuar Kuvendin, përgjegjësinë e kanë të gjithë deputetët dhe po bëjnë gabim që po e pamundësojnë kuorumin për votimin e fshehtë”, u shpreh Kurti.
