Për herë të dymbëdhjetë me radhë, deputetët e Kuvendit të Kosovës nuk arritën të konstituojnë institucionin ligjvënës. Seanca e mbajtur të martën u mbyll pa sukses, pasi nuk u arrit të zgjidhej kryetari i Kuvendit, duke e shtyrë edhe më tej nisjen e punës parlamentare.
Kryesuesi i seancës, Avni Dehari nga Lëvizja Vetëvendosje, përsëriti kërkesën që votimi për kryeparlamentarin të zhvillohet përmes një procesi të fshehtë. Ai ftoi subjektet politike të propozonin anëtarë për komisionin verifikues, si hap paraprak për procedurën e votimit.
Megjithatë, ftesa e tij u injorua nga partitë opozitare PDK, LDK, AAK, Nisma si dhe nga Lista Serbe, të cilat refuzuan të marrin pjesë në këtë proces.
Në sallë ishin të pranishëm 113 deputetë, por mungesa e dakordësisë politike e bëri të pamundur vazhdimin e procedurave.
Procesi i konstituimit të Kuvendit ka nisur më 15 prill, por ka mbetur i bllokuar në pikën e zgjedhjes së kryetarit, për shkak se LVV-ja nuk ka arritur ende të sigurojë shumicën prej 61 votash për kandidaten e saj, Albulena Haxhiu.
Përballë mungesës së konsensusit, seanca u ndërpre dhe kryesuesi Dehari njoftoi se ajo do të rifillojë më 9 maj.
