Deputetja e Partisë Demokratike, Albana Vokshi, është paditur për shpifje nga biznesmenja Vilma Nushi dhe kompania e saj “3P Life Logistic”.
Padia, bazuar në Nenin 120 të Kodit Penal, u ngrit pas deklaratave të bëra nga Vokshi si kryetare e Komisionit Hetimor Parlamentar të Shëndetësisë, në lidhje me çështjen e “Sterilizimit”.
Seanca e parë gjyqësore, e planifikuar për këtë të enjte në Gjykatën e Posaçme për Korrupsionin dhe Krimin e Organizuar, ku palët do të kishin mundësinë të pajtoheshin, u shty për shkak të mungesës së tyre.
Vokshi, e cila ndodhet jashtë vendit për angazhime, ka njoftuar se do të marrë pjesë në seancat e ardhshme për të sqaruar akuzat dhe faktet që ka paraqitur në Komisionin Hetimor.
Nga ana tjetër, biznesmenja Vilma Nushi, përmes kompanisë së saj, ka qenë përfituese e koncesionit të “Check Up”, një çështje që është aktualisht nën hetim nga SPAK.
