Ish-kryeministri Sali Berisha, ka akuzuar kryeministrin Edi Rama se ka urdhëruar arrestimin e kryetarit të degës së PD-së në zonën e Kasharit, Arsen Valisi. Gjatë një tubimi, Berisha deklaroi se “po provokojnë opozitën” dhe se pavarësisht këtyre përpjekjeve, opozita do të vazhdojë betejën për Shqipërinë.
Berisha tha: “Rruga që kemi zgjedhur nuk është e lehtë. Kemi të bëjmë me kriminelë, me vrasës, me banditë. Sot, Edi Rama ka urdhëruar Taulantin me 5 mbiemra të arrestojë kryetarin e degës së PD të zonës së Kasharit, zotin Arsen Valisi.”
Ai paralajmëroi Taulant Ballën të lirojë Valisin menjëherë, duke shtuar: “Çdo ditë e tij në qeli, do jenë vite burgu për ty.”
Berisha theksoi se opozita do të vazhdojë betejën për të luftuar “mercenarët dhe bandat kriminale” dhe se “historia kurrë nuk do të na e falë” nëse nuk përballen me to. Ai përfundoi me premtimin: “Një nga një do japin llogari për çdo qindarkë që u kanë vjedhur ju. Me gërshërët e ligjit do presim çdo lidhje kriminale të tyre.”
