Plasja e skandalit për tenderin e Unazës së Madhe ka sjellë shkarkimin e drejtorit të Përgjithshëm të ARRSH, Afrim Qendro. Mirëpo mesa duket situata nuk qëndron ashtu siç pretendohej. Sipas deputetit të Partisë Demokratike, Agron Shehaj, kjo është e gjitha një mashtrim sepse Qendro nuk është shkarkuar, por është transferuar.
Pra momentalisht sipas Shehaj, Qendro nuk mban më titullin Drejtori i Përgjithshëm, por Zv.Drejtor i Përgjithshëm i ARRSH.
“Afrim Qendro nuk është hequr nga puna, thjesht ka ndryshuar titullin nga Drejtor në Zv. Drejtor të përgjithshëm të ARRSH-së ku ai vazhdon të bëjë ligjin,” shkruan Shehaj.
Ai shton se në vend të burgut, Qendro është shpërblyer me pushtet. Megjithatë për hir të fasadës, iu ul titulli.
“Mjafton ky fakt për të kuptuar që hajduti i vërtetë i 18 milionë eurove të projektit të unazës (dhe 12 milionë të tjerave të OST-së) është Edi Rama,” vijoi Shehaj.
Deputeti i PD shprehet se Rama duke mbrojtur dhe mbështetur “Afrim Qendron dhe të tjerët” që sipas tij janë ndihmesa në krim, kryeministri po mbron veten.
