Procesi i vaksinimit në Shqipëri po vazhdon me ritme shumë të ngadalta, teksa shumë mjekë e infermierë janë ende duke pritur për të marrë dozat e para. Ditën e sotme në qendrën e vasksinimit në stadiumin “Air Albania” është vaksinuar edhe kreu i Urgjencës Kombëtare Skënder Brataj. Ka qenë ministrja e Shëndetësisë dhe Mbrojtjes Sociale që e ka publikuar videon në Instagramin e saj pasi ka ndjekur nga afër procesin e vaksinimit. Ndërkohë, Brataj ka thënë se gjatë pritjes për dozën e dytë duhet treguar kujdes.
“Vaksina të siguron mbrojtje, do presim edhe 21 ditët që të bëjmë dozën e dytë. Por midis këtyre dy vaksinave duhet të vijojmë të ruhemi”, tha Brataj.
Nga ana tjetër ministrja Mnasatirliu ka bërë të ditur se ditën e sotme do të vaksinohen 500 mjekë dhe infermierë.
“Po vijojmë intesivisht me të gjithë ekipet tona. Po përfundon QSUT, Urgjenca Kombëtare, spitali Dibrës, Krujës, sot vetëm tek Arena Kombëtare vaksinohen më shumë se 500 punonjës të shëndetësisë, ndërkohë që vijon vaksinimi edhe për të moshuarit në shtëpitë e të moshuarve. Jemi në një moment pune intesive”, tha Manastirliu.
Mbrëmjen e djeshme Skënder Brataj deklaroi në studion e emisionit Open se duhet të ishte i pari që të merrte vaksinën sepse ishte edhe i pari që u infektua në mars të vitit të kaluar, por deri sot ai priti radhën. Ndërkohë, jashtë radhe janë vaksinuar disa nga personalitetet e moshuar, gjë që ka shkaktuar shumë debat për një përzgjedhje privilegjese.
