Deklaratat e kryeministrit Edi Rama gjatë një mitingu elektoral në kuadër të fushatës për zgjedhjet e 11 majit kanë ngjallur reagime të forta, veçanërisht për përdorimin e termit “autik” në një kontekst përçmues ndaj kundërshtarëve politikë.
Gjatë fjalës së tij, Rama tha: “Të zgjedhësh midis BE dhe kënetës, kënetën domethënë nuk je mirë, politikisht je autik, s’je mirë”. Kjo deklaratë është cilësuar si diskriminuese dhe fyese për personat me aftësi ndryshe, duke përfshirë edhe ata në spektrin e autizmit.
Në një intervistë për Syri TV, profesor Edmond Tupja reagoi ashpër ndaj kësaj deklarate, duke e konsideruar atë si kulmin e çnjerëzores dhe si një dëshmi të thellë të qëndrimeve përçmuese të kryeministrit ndaj njerëzve në përgjithësi.
“Për ata që kanë mend për të kuptuar e gjykuar, kjo tregon se kemi një kryeministër çnjerëzor, në përmasa të jashtëzakonshme, nuk ka dhembshuri për njeriun. Ai ka një problem të madh me vetveten, urren edhe vetveten, edhe të tjerët i urren. Është shoqërisht i rrezikshëm, ndërkombëtarisht i rrezikshëm. Nuk ka dhembshuri për tjetrin, është sadist”, u shpreh Tupja.
Më tej, ai theksoi se fjalët e Ramës përbëjnë një fyerje të rëndë për prindërit dhe familjet që rrisin fëmijë me nevoja të veçanta, duke i cilësuar këto deklarata si “zhgënjyese dhe çnjerëzore”.
“Kur hapa fjalorin një ditë, te fjala një epitet, përbindësh. Monstër. Përkufizimi i fjalës përbindësh në fjalor: ‘Njeri i pashpirt, mizor dhe i neveritshëm’. Me këtë që ka bërë ai, Edi Rama është i neveritshëm, më vjen për të vjellë. I vuri vulën përbindshmërisë së tij”, deklaroi më tej profesori.
Këto deklarata kanë nxitur reagime të shumta në rrjetet sociale dhe opinionin publik, duke kërkuar një reflektim të menjëhershëm mbi mënyrën e komunikimit në skenën politike, veçanërisht kur përmenden kategori të ndjeshme të shoqërisë.
