Deklaratat e bëra gjatë takimit midis dy qeverive, asaj të Kosovës dhe Shqipërisë për heqjen e kufijve midis dy vendeve ngjalli shumë debate dhe tensione te serbët.
Kësisoj Ministria e Punëve të Jashtme e Serbisë ka njoftuar ditën e sotme se do t’i dorëzojë një notë proteste ambasadorit të Shqipërisë në Beograd, Ilir Boçka.
Serbia e arsyeton këtë shenjë proteste me deklaratat e kryeministrit të Shqipërisë, Edi Rama për heqjen e kufirit me Kosovën më 2 tetor 2020.
“Deklarata të tilla, të cilat nënkuptojnë bashkimin e Shqipërisë dhe provincës serbe të Kosovës dhe Metohisë dhe krijimin e një Shqipërie të Madhe, janë një arsye e justifikueshme shqetësimi, si për Republikën e Serbisë ashtu edhe për vendet e tjera në rajon të angazhuara për ruajtjen e stabilitetit dhe intensifikimin e bashkëpunimit në rajon”, thuhet në njoftimin e ministrisë serbe.
Kujtojmë se takimi mes dy qeverive Kosovë-Shqipëri, solli alarmim te ministri serb i Mbrojtjes, Aleksandër Vulin, duke thënë se ky plan është një katastrofë që vetëm serbët mund ta ndalin.
Por deklarata të tilla sollën reagimin e menjëhershëm të kryeministrit Edi Rama, i cili i kërkoi Vuçiç ta dënonte deklaratën, duke e cilësuar si një shfaqje të metë. Por sërish, Vulin s’i ka ndalur replikat. Ministri serb ofendoi sërish kryeministrin Edi Rama, duke thënë se ai mbahet mend për çorape të shqyera dhe jo për ide të shkëlqyera.
