Ish-ministri i Jashtëm, Ditmir Bushati ka qenë i ftuar në emsionin A Show të Adi Krastës ku ka folur për përjashtimin e tij nga listat e PS dhe për kandidatët që janë përzgjedhur. Bushati ka thënë se në lista ka drejorë që janë përgjegjës për gjakderdhje financiare në fusha të ndryshme të vendit. Megjithatë Bushati është shprehur se ka ambicie për më lartë dhe nuk ka komplekse. Ai ka thënë se familja e tij nuk ka konsumuar asnjë para nga buxheti i shtetit me përjashtim të rrogës që ai ka marrë si ministër dhe deputet.
“Sot për sot ne kemi arritur në një pikë që më i rëndësishëm duket një ekzekutor i gjakderdhjes financiare. E kam fjalën për ata drejtora janë në listën tonë, të cilët kanë përgjegjësi të rëndë, për gjakderdhjen financiare në fusha të ndryshme të vendit se sa për një njeri që mund të vijë me diploma nga Oxford, Harvard. Po unë e kam ambicien, sepse e kam edhe për më lart, unë i ri jam, jetën përpara e kam. Për këtë nuk kam komplekse. E di çfarë do kisha kompleks unë? Nëse dikush do më akuzonte se kam bëtë pakt me djallin, që ju jap akses njerëzve të dyshimtë, që do të isha peng i këtyre njerëzve etj. Nuk është çështje e Ditmirit, ai është një individ. Për Ditmirin merakoset familja, shokët e shoqet e tij. Familja ime nuk ka konsumuar asnjë para nga buxheti i shtetit me përjashtim të rrogës që kam marrë si deputet dhe ministër i Jashtëm. Im atë, një komunist, i dha lamtumirën në 1990 dhe nuk u përfshi në politikë që vazhdojnë edhe sot’. “- ka thënë Bushati.
