Ditën e sotme Drejtoria Vendore e Kufirit dhe Migracionit Korçë ka dhënë një njoftim lidhur me situatën e krijuar nga reshjet me e dëborës me intensitet të lartë jo vetëm në Shqipëri por edhe me vendet me të cilat kufizohemi.
Sipas njoftimit të bërë, mjetet e tonazhit të rëndë (kamionët) nga Shqipëria nuk do lejohen të kalojnë në Maqedoni të Veriut apo në Greqi për shkak të situatës së krijuar nga reshjet e shumta të dëborës.
Njoftimi i Plotë nga Stacionet e Policisë Kufitare Qafë Thanë dhe Kapshticë:
Autoritetet e Policisë Maqedonase dhe Policisë Greke, kanë njoftuar palën shqiptare, se për shkak të reshjeve të dendura të borës në Maqedoni dhe Greqi, vështirësive në lëvizje, prezencës së akullit në rrugë, deri në normalizimin e situatës dhe pastrimit të rrugëve, do të ndalohet lëvizja e mjeteve të tonazhit të rëndë, në pikat e kalimit kufitar Qafë Thanë dhe Kapshticë.
Apelojmë të gjithë drejtuesit e mjeteve të kësaj kategorie (kamionave), që deri në një njoftim të dytë të shmangin lëvizjen në drejtim të Maqedonisë dhe Greqisë, pasi nuk do lejohet kalimi i tyre drejt shteteve fqinje, për shkak se krijohen vështirësi në trafik dhe pengesa për mjetet borëpastruese.
Duke ju falenderuar për mirëkuptimin.
