Reshjet e dendura të dëborës, të shoqëruara me temperatura të ulëta dhe erëra të forta, kanë krijuar vështirësi në qarkullimin e mjeteve në zonat veriore dhe juglindore të Shqipërisë.
Sipas Autoritetit Rrugor Shqiptar (ARRSH), të gjitha rrugët nacionale janë të hapura dhe të qarkullueshme, por në akset me prezencë dëbore rekomandohet përdorimi i gomave dimërore ose zinxhirëve për të shmangur aksidentet dhe bllokimet.
Akset problematike sipas ARRSH:
• Zona Veriore: Vaudejes-Pukë-Fushë Arrëz-Kalimash dhe Qafë Mali (trashësia e dëborës deri në 50 cm). Probleme janë raportuar edhe në segmentet Skurraj-Peshkopi, Kukës-Ura e Zapodit, Kukës-Krumë-Kam, Kukës-Bushtricë dhe Ura Fanit-Shpal, ku rekomandohet pajisja me zinxhirë.
• Rajoni Qendror: Rruga e Dajtit dhe segmentet Qafë Prisk-Qafë Mollë-Bizë dhe Librazhd-Steblevë në kilometrin e fundit kërkojnë goma dimërore ose zinxhirë.
• Rajoni Juglindor: Akset Qafë Thanë, Qafë Plloçë, Korçë-Dardhë, Korçë-Voskopojë, Korçë-Ersekë dhe Ersekë-Leskovik kanë pasur reshje të dendura dëbore. Borëpastrueset janë në terren, por përdorimi i zinxhirëve mbetet i domosdoshëm.
ARRSH u bën thirrje qytetarëve të shmangin lëvizjet e panevojshme në zonat e prekura dhe të jenë të pajisur me zinxhirë gjatë udhëtimit, për të siguruar lëvizje të sigurt dhe të pandërprerë.
