Në një interpelancë të zhvilluar në Kuvend, ku mungonin ministrja e Arsimit dhe deputetët e mazhorancës, deputetja demokrate Ina Zhupa ngriti shqetësime serioze mbi gjendjen e arsimit shqiptar dhe sigurinë në shkolla. Interpelanca vjen pas tragjedisë së ndodhur me 14-vjeçarin Martin Cani.
Zhupa kritikoi ashpër ministren Manastirliu për mungesën e përgjegjshmërisë institucionale dhe reagimin ndaj ngjarjeve të fundit në sistemin arsimor. Ajo theksoi se tragjedia e ndodhur kërkon vëmendje dhe reagim serioz, jo shmangie të përgjegjësisë.
Deputetja demokrate paraqiti një listë problemesh që kanë tronditur arsimin shqiptar vetëm në dy muajt e fundit: vdekja e një të mituri, plagosja e një tjetri, mbyllja e një universiteti privat për diploma të falsifikuara, arrestimi i shtatë pedagogëve për korrupsion në provime, një pedagog i arrestuar për lidhje me grupe kriminale, 14 mësues të dënuar për nota fiktive, si dhe përdorimi i një shkolle të braktisur për kultivim kanabisi.
“A kanë përgjegjësi institucionet për këtë ngjarje? A është kjo ngjarje një rast i veçuar? A kanë fëmijët tanë sot siguri në shkollat publike?” – pyeti Zhupa, duke theksuar mungesën e psikologëve të nevojshëm për trajtimin e konflikteve mes nxënësve.
Sipas Zhupës, ministrja Manastirliu po i shmanget përgjegjësisë duke u fshehur pas protestave të qytetarëve dhe opozitës. Ajo theksoi se prindërit e fëmijëve shqiptarë nuk e falin papërgjegjshmërinë e ministres dhe kërkon një platformë për dekriminalizimin e arsimit.
Deputetja solli në vëmendje edhe një incident të mëparshëm ku, sipas saj, ministrja dhe deputetët e mazhorancës treguan mungesë ndjeshmërie ndaj çështjeve serioze, duke u fokusuar më shumë në debate të panevojshme sesa në zgjidhjen e problemeve reale në sistemin arsimor.
