Edhe pse nuk u pranua kërkesa e disa deputetëve të opozitës për të ndryshuar rendin e ditës dhe për të diskutuar në lidhje me arrestimin e Charles McGonigal, ish-drejtori i Kundërzbulimit të FBI, Berisha së bashku me mbështetësit e tij në Kuvend kanë bllokuar foltoren.
Kreu i PD akuzoi drejtpërdrejt Ramën se ka paguar ish-zyrtarin e lartë të FBI-së për të sulmuar opozitën.
“Të dashur qytetarë dhe qytetare, këto ditë Shqipëria gjendet në epiqendër të një cikloni që do pushtonte çdo vend të madh. Kryeministri i Shqipërisë, ministrat e tij, këshilltarët, janë të implikuar direkt në një aferë korruptive në korruptimin e njërit prej njerëzve me njohuri të një institucioni më sensitiv në SHBA për sigurinë e këtij vendi dhe të vendeve të lira. Prej muajsh një juri ka urdhëruar hetimin e çdo mesazhi, takimi, udhëtimi, çdo dhurate, çdo e-maili dhe gjithçka tjetër midis Mcgonigal dhe Duçkën, Nezës dhe Ramës. Kjo juri e citon në vendimin e saj Edi Ramës dhe vetëkuptohet se për të bërë një kontroll të tillë, nuk bëhet pa vendosur nën hetim personat e sipërcituar. Skandali shpërtheu në mënyrën më të fuqishme pas arrestimit në aeroportin e SHBA të ish-zyrtarit nga FBI, i cili akuzohet se në raport me kryeministrin e Shqipërisë ai ka fshehur, manipuluar, falsifikuar, dokumente. Akuzohet se ky njeri i pafytyrë, pa karakter, që ka shkelmuar interesat e vendit të tij, ka marrë porosi me para nga zyra e kryeministrit shqiptar, për të hetuar lobimin e opozitës. për të manipuluar….Jemi këtu ne dhe qëndrojmë sot deri pasnesër ne drekë. Ky kryeministër ka kryer një krim të shëmtuar. Ka keq shfrytëzuar një njeri të pamoral. Në vend që ta denonconte në vendin e tij, e ka përdorur kundër opozitës, për manipulime, kundër saj. Kjo ndodh vetëm në Korenë e Veriut, apo në Venezuelë.”, tha Berisha.
