Kreu i LZHK-së, Dashamir Shehi, ka folur hapur për ato që mendon se janë problemet më të madha që është duke kaluar momentalisht Partia Demokratike.
I ftuar në emisionin “A Show”, ai ka folur për liderin e koalicionit opozitar dhe jo vetëm, edhe për udhëheqjen e partisë dhe këshillat që i ka dhënë Bashës.
“Partia Demokratike vuan akoma e një hapje reale. Ditën që hapet që ka një debat të brendshëm, që ka korrent brenda një partie të cilën ato e kanë quajtur gjithnjë si dobësia e partisë, unë e kam thënë që forca e madhe e një partie janë korrentet”.
Sipas Shehit, korrenti është ai që e bën një parti, ose e thënë më saktë një forcë të eci përpara dhe të përmirësohet.
“Demokristianët e Italisë administruan 40 vjet Italinë. Ishin demokraci e mbyllur por nëpërmjet korrenteve. Partia Demokratike fatkeqësisht ka qenë një parti e koncentruar. Korrentet me fraksionet janë dy gjëra të ndryshme. Korrentet janë rryma, përrenj që derdhen në një lumë. Fraksionet janë nga një gjë e ngurtë, shkëputet prapë një gjë e ngurtë edhe shkëputet. Unë ua kam sugjeruar shpesh herë kolegëve të mi, sigurisht që nuk iu vjen mirë që e thotë një nga jashtë. Unë do ua rekomandoja dhe partive të tjera”, tha Shehi.
