Një nga neuropsikiatrët më të njohur shqiptar, prof. d.r Hiqmet Shqerra ka ndërruar jetë në moshën 82 vjeçare, pas infektimit me koronavirus.
Ai ishte i shtruar në spitalin COVID 3, por nuk ka mundur të fitojë betejën me koronavirusin duke u ndarë nga jeta pak pas mesnate.
Doktor Shqerra lindi në Elbasan në një familje autoktone dhe me tradita. Ai studioi në Fakultetin e Mjeksisë dhe u specializua në Degën e Psikiatrisë me rezultate të larta dhe më pas mori titujt akademikë.
Gjatë eksperiencës së tij 56-vjeçare si mjek neuropsikiatër, doktor Shqerra dha një kontribut shumë të rëndësishëm në trajtimin dhe kurimin e qindra pacientëve shqiptarë me probleme të shëndetit mendor.
Për 20 vite drejtoi Spitalin psikiatrik të Elbasanit ku u shqua për aftësitë e veçanta profesionale dhe komunikimin e jashtëzakonshëm human me pacientët, familjarët dhe të gjithë komunitetin.
Kujtojmë se kjo nuk është humbja e parë nga bluzat e bardha. Para katër ditësh ka ndërruar jetë dhe një mjek tjetër i njohur në qytetin e Beratit.
Bëhet fjalë për mjekun Josif Dena. Ai ishte i shtruar prej 2-javësh në Spitalin “Shefqet Ndroqi” dhe ditët e fundit ishte në intubim për shkak të përkeqësimit të gjendjes së tij shëndetësore, por nuk mundi të mbijetonte.
