Dy javë pas rikthimit në normalitet, në spitalin “Shefqet Ndroqi” është rikthyer Covid-19, pasi janë zbuluar dy raste të reja.
“BalkanWeb” raporton se bëhet fjalë për dy pacientë të shtruar, një prej të cilëve, një grua 80-vjecare, ka ndërruar jetë mëngjesin e ditës së enjte.
Por, thuhet se rastet nuk janë bërë me dije nga Ministria e Shëndetësisë, pasi në buletinin e përditësuar të 24 orëve të fundit, ministria thotë se janë 23 raste të reja me Covid, prej tyre 2 punonjës personel mjekësor, por nuk përmendet asnjë rast vdekjeje nga Covid-19 në spitalin “Shefqet Ndroqi”, dhe as transferimi i një prej pacientëve në shërbimin Infektiv.
80-vjeçarja ka qenë shtruar për një periudhë të gjatë në shërbimin e sëmundjeve interne dhe ka dalë nga ky spital 10 ditë më parë, për tu rikthyer sërish për të njëjtën sëmundje të diagnostikuar më herët: fibrozë në mushkëri, këtë herë në spitalin “Shefqet Ndroqi”, pas rikthimit në normalitet.
Gjendja shëndetësore e 80-vjeçares ka qenë tejet e rënduar dhe pas 24 orëve ajo ka ndërruar jetë mëngjesin e të enjtes.
Po ashtu, raportohet se mjekët nuk kanë qenë në dijeni se gruaja ishte prekur nga Covid-19, derisa tamponi doli pozitiv.
Ndërkohë, rasti i dytë është transferuar mbrëmjen e djeshme në Spitalin Infektiv.
