Ish-prefekti i Shkodrës, Çesk Millja, ka folur për herë të parë pas shkarkimit.
Në një deklaratë për mediat ai u shpreh se nuk është kohë deklaratash, por duhen rritur masat për parandalimin e përhapjes së COVID-19.
Në lidhje me motivacionin e shkarkimit, Millja tha se në shkresë shkruhej vetëm: “Lirohesh nga detyra”.
Ish-prefekti shtoi se gjatë punës së tij prej dy vitesh ka qenë i përkushtuar
“Jam sot këtu për të zbatuar detyrimin ligjor, në kuadër të zbatimit të detyrës dhe meqë më dolët para nuk mund t’ju anashkaloj juve sepse kam bashkëpunuar gjatë gjithë kohës. Duke ju falenderuar edhe ju, sot nuk është ditë konferencash por pune për të rritur gjithnjë e më shumë masat për parandalimin ndaj një fenomeni të vështirë që po kalojmë. Do këshilloja që themelore është të marrim masa e punojmë të gjithë së bashku për të realizuar një mision, të gjithë bashkë përkëtë qëllim. Isha jo vetëm për të dorëzuar detyrën por edhe falenderuar kolegët e mi që kanë menaxhuar dhe zbatuar të gjitha aktet ligjore dhe normative. Të shikojmë përpara dhe të mos shikohet pas, motivacioni është “lirohesh nga detyra”, ky është motivacioni nga kryeministri. Nuk është detyra ime të them se çfarë vendimi është por di të them se kam qenë i përkushtuar dhe ju jeni pasqyra e punës sime për punën e gjithë strukturave territoriale. Ju uroj gëzuar Pashkët për ato që i kaluan e që nuk kisha mundësi të përshëndesja, për ato të ardhshmet ortodokse dhe muajin e Ramazanit”, u shpreh ai.
Të shtunën, ministri i Brendshëm, Sandër Lleshaj, njoftoi shkarkimin e prefektit të Shkodrës.
Lleshaj pas shkarkimit u shpreh, se nga ana e prefektit gjatë periudhës së pandemisë, është vërejtur një inerci burokratike e papranueshme dhe një hezitim për të marrë përgjegjësi.
Në vendin e tij, Këshilli i Ministrave vendosi që të komandojë Besfort Lamallarin, ish-zv. ministër i Brendshëm.
