Shqipëria po përjeton krizë ekonomike në shumë sektorë për shkak të situatës së shkaktuar nga pandemia Covid-19.
Shumë përsona kanë humbur vendin e tyre të punës, pasi shumë biznese kanë ulur përfundimisht qepenat.
Baret dhe restorantet ishin sektori i parë që u godit nga efektet e karantinimit, pas masave drastike të marra nga qeveria për të kufizuar përhapjen e infeksionit të Covid-19.
Shumë prej këtyre bizneseve u detyruan të mbylleshin, ku siç e thamë edhe më lart sollën largimin nga puna të shumë personave të punësuar.
Sipas INSTAT, në vendin tonë ka rreth 18 mijë bare e restorante (82% e të cilave janë bar-kafe), me mbi 50 mijë të punësuar, ose rreth 10% të të punësuarve në sektorin privat në total.
Këto të dhëna nga INSTAT, bëjnë të ditur se pasojat ishin të mëdha, ndaj edhe baret e restorantet rezultojnë ndër më të goditurat nga kriza, sa i takon efektit në punësim.
Për tremujorin e parë të vitit, numri i të punësuarve në këtë aktivitet ra me 21.7% dhe fondi i pagave u tkurr me rreth 20.6%.
Kjo është parë si performanca më e keqe nga të gjithë sektorët e tjerë përsa i takon punësimit.
Në të gjithë aktivitetet e tjera të shërbimeve, numri i të punësuarve ishte në rritje në tremujorin e parë, duke reflektuar ecurinë e dy muajve të parë të vitit, por duket se baret e restorantet morën goditje më të shpejtë dhe më të fortë.
Tashmë baret dhe restorantet janë hapur pas më shumë se dy muaj mbylljeje, por ecuria e tyre nuk është edhe aq pozitive.
Operatorët e tregut pohojnë se konsumi dhe frekuentimi është i ulët, sidomos për restorantet.
Ato që vijojnë të jenë ende të mbyllura, janë klubet e natës.
“Nëse qeveria nuk ndërhyn me grante apo subvencionim të qirasë, këto biznese do të falimentojnë.
Flasim për struktura që kanë kushtuar me qindra apo mijëra euro dhe me kosto të lartë në mirëmbajtje”, pohon Enri Jahaj, anëtar i bordit drejtues të Shoqatës të Bareve, Restoranteve dhe Klubeve.
“Ne si shoqatë parashikojmë që do të ketë një falimentim në masë, sidomos bizneset familjare të ngritura me investime minimaliste nuk do t’i mbijetojnë dot krizës dhe sjelljes sonë ndryshe”, ka pohuar më herët ai për “Monitor”.
Shqipëria rekord në botë
Përsa i takon numrit të bareve Shqipëria ka vendosur rekord vitet e fundit.
Në vendin tonë numërohen 518 bare për çdo 100 mijë banorë, sipas të dhënave të përpunuara të INSTAT për numrin e bareve dhe popullsinë, duke kapur rekord jo vetëm në Europë, por edhe në botë.
Ndërsa lë shumë pas vendet e Ballkanit Perëndimor.
Pas Shqipërisë renditet Portugalia, e cila kishte 427 bare për çdo 100 mijë banorë.
Portugalia renditet e para në top 5 vendet me numrin më të lartë të bareve për banorë, e më pas në renditje vazhdon Spanja me 392 bare për 100 mijë banorë, Greqia me 343, Kroacia me 240 dhe Italia me 211.
