Prokurori i Përgjithshëm, Olsian Çela nëpërmjet një letre, u ka kërkuar prokurorëve që të kontribuojnë financiarisht me sa munden, për të kaluar situatën e krijuar nga COVID-19.
Letra u është drejtuar prokurorëve të Prokurorisë së Përgjithshme, atyre të Apelit dhe të rretheve.
Sipas tij, në këto momente është i nevojshëm kontributi dhe solidariteti i çdo qytetari të Republikës së Shqipërisë.
Këtë iniciativë Çela e ka quajtur një detyrim moral ndaj vendit dhe qytetarëve shqiptarë.
“Nisur nga situatë e emergjencës së krijuar në vend nga epidemia e shkaktuar nga përhapja e COVID 19 si dhe gjendja e fatkeqësisë natyrore të shpallur nga qeveria, është i nevojshëm kontributi dhe solidariteti i cdo qytetari të Republikës së Shqipërisë, duke përfshirë magjistratët dhe institucionet e drejtësië. Në këto kushte, Prokurori i Përgjithshëm do të mirëpriste përkrahjne e kësja iniciative nga cdo prokuror apo oficer i policisë gjyqësore, duke e konsideruar atë si një detyrim moral ndaj vendit dhe qytetarëve shqiptarë”,- thuhet në letrën e tij.
Kujtojmë këtu se gjatë 24 orëve të fundit u regjistruan 17 raste të reja me COVID-19, duke e çuar numrin në 400.
Në mesin e tyre numërohen 22 viktima dhe 154 të shëruar.
Në spitalin Infektiv ndodhen 52 të shtruar, 5 prej të cilëve në terapi intensive.
Tek “Shefqet Ndroqi” ndërkohë, ndodhen gjashtë pacientë, 5 prej të cilëve në terapi intensive, 1 në pavion dhe 4 të intubuar.
