Koronavirusi ka sjellë të tjera anomali në lëvizjen e lirshme të shtetasve shqiptarë drejt vendeve të rajonit. Sapo u rihap dogana e Kakavijës në Jug, në kufi me Greqinë, autoritetet tona këtë herë bënë një bllokim në Veri.
Kështu, duke filluar nga dita e sotme, pika kufitare e Hanit të Hotit dhe ajo Muraqnit në Koplik dhe Shkodër, do të mbyllen totalisht, nga ora 19:00 deri në orën 05:00 të mëngjesit.
Sipas policisë tonë kufitare, shkak për mbylljen e dy pikave kufitare me Malin e Zi, është bërë rritja e shifrave nga koronavirusi.
Përmes një njoftimi zyrtar, Drejtoria Vendore e Kufirit dhe Migracionit Shkodër, shkruan se, këto dy pikë-kalime kufitare do të jenë të mbyllura gjatë ditës, si pasojë e rritjes së numrit të të infektuarve me Covid-19.
Njoftimi i policisë:
Autoritetet policore malazeze, nëpërmjet një njoftimi zyrtar kanë informuar se me vendim të Komisionit Shtetëror të Menaxhimit të Situatës për COVID-19, duke nisur nga sot, datë 25.11.2020 dhe çdo ditë, deri në një urdhër të dytë, nga ora 19:00 deri në orën 05:00 të mëngjesit të çdo dite do të ketë ndalim të plotë të qarkullimit në të gjithë territorin e Malit të Zi.
Përjashtim nga ky rregull bëjnë mjetet e tonazhit të rëndë që kalojnë në kufi (kamionët), mjetet që udhëtojnë drejt aeroportit, shërbimet e urgjencës dhe mjetet ose shtetasit që kalojnë tranzit në territorin e Malit të Zi.
Sqarojmë se shtetasit shqiptarë mund të kalojnë nëse janë të pajisur me testin serologjik, brenda orarit të përcaktuar 05:00-19:00.
Duke ju falënderuar për mirëkuptimin.
/GazetaReforma.com/
