349 viktima janë shënuar në 24 orët e fundit në Itali, duke e thelluar bilancin e COVID-19 në vendin fqinj.
Lajmin e kanë bërë të ditur autoritetet vendase, të cilat në përditësimin e përditshëm që bëjnë rreth situatës së Coronavirusit, kanë njoftuat se nga fillimi i shpërthimit deri tani numrin total i viktimave ka shkuar në 2159 të vdekur.
Ndërkohë, janë infektuar mbi 27 mijë persona, duke bërë që Italia të vijojë të renditet në vendin e dytë në rang botëror pas Kinës për numrin e të infektuarëve dhe viktimave nga Coronavirusi.
Nga ana tjetër, kujtojmë se kryeministri italian Giuseppe Conte, ditën e sotme ka miratuar dekretin ‘Cura Italia’ për emergjencën e Coronavirusit, duke ofruar 25 miliardë euro për familjet dhe bizneset.
Në rang botëror deri tani janë shënuar 6,717 viktima dhe janë regjistruar 175,871 të infektuar në 162 shtete, ndërsa në vendin tonë deri tani ka humbur jetën 1 person dhe janë infektuar 51 të tjerë, teksa në Kosovë janë 15 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
