Me mbërritjen e COVID-19 në vendin tonë qeveria vendosi të mbyllte institucionet arsimore deri më 23 mars.
Mirëpo, nisur nga numri i lartë i të infektuarve dhe situata delikate, ministrja e Shëndetësisë, Ogerta Manastirliu, ka firmosur udhrin e ri, i cili parashikon mbylljen për të gjitha institucionet arsimore deri më 3 prill të këtij viti.
Këto masa vijnë në kuadër të parandalimit të përhapjes së COVID-19, i cili ka goditur vendin tonë që prej 9 marsit duke marrë 2 jetë njerëzish, teksa ka infektuar 64 persona.
Numri total i viktimave në rang botëror deri tani është 9, 377 persona dhe janë 228,687 të infektuar në 177 vende, teksa në Kinë në 24 orët e fundit për herë të parë që nga shpërthimi i virusit nuk është shënuar asnjë i infektuar.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
