Gazetari Basir Çollaku ka komentuar aksionin e zhvilluar nga Prokuroria e Posaçme, e cila ekzekutoi tetë masa sigurie ndaj zyrtarëve dhe biznesmenëve në lidhje me tendera të dyshuar si abuzivë në Agjencinë Kombëtare të Shoqërisë së Informacionit (AKSHI).
Në një intervistë për News24, Çollaku u shpreh se hetimet e SPAK tregojnë se, sipas tij, aktiviteti i një grupi të strukturuar kriminal ka pasur si pikë reference Kryeministrinë. Ai tha se çështjet për AKSHI-n janë të vjetra dhe lidhen me praktika të nisura vite më parë, duke shtuar se aksioni i sotëm përbën një zhvillim të rëndësishëm për opinionin publik.
“Është kronikë e paralajmëruar më herët. Kzuat për AKSHIN janë të vjetra, të bëra që nga Ahmetaj. Sot jemi një aksion të vërtetë. Veprime të kryera nga një organizatë kriminale. Ky është pretendimi ligjor. Ka një zyrë, një adresë, AKSHI, që i ka zyrat në Kryeministri. Kjo organizatë i ka pasur aktivitetin kriminal në Kryeministri. Nuk besoj se çunat me patllake…se kështu i thoshte dhe Rama. Të gjitha dosjet të çojnë në Kryeministri. Ky është telash pozitiv për opinion publik. Rastin Balluku, e quaj dosja Rama-Balluku se nuk i ndaj dot. Këtu kemi një nga ortakët e marrë peng, që është kanosur. Këtu kemi hyrë në banesën e kryeministrit, motra e bashkëshortes, vajza e saj, ore ka njeri të papërfshirë në familjen e kryeministrit? Akuzat zyrtare të SPAK ku flitet për shkelje të barazisë në tendera, pastrim parash, kemi policinë e shtetit të përfshirë. Policia përfshihet në jo pak dosje. Në kuadër të grupit të strukturuar, nga vinin këto porosi? Kush kishte dijeni? Zyrat e saj janë në Kryeministri. Ky ose është budalla, ose i verbër?! Këtë herë besoj se përgjimi do të shkoj në familjen e tij, në shtëpinë e tij. Mund të ketë përgjime që dialogjet që na çojnë në rrethana të tjera.”, tha Çollaku.
Duke u ndalur te rasti i Belinda Ballukut dhe vendimi i Gjykatës Kushtetuese për rikthimin e saj në detyrë, Çollaku deklaroi se, sipas tij, ekziston ende një nivel që SPAK nuk e ka prekur. “Një nivel ka pa konsumuar SPAK, që është ai i kryeministrit. Rasti i kthimit të Ballukut në zyrë, jep mundësi për të prekur provat. Inditidim dëshmitarësh. Deri në 22 janar Balluku do të jetë në Kuvend. Shpresoj që SPAK t’i drejtohet Kuvendit për këtë rast, që t’i hiqet imuniteti dhe më pas të arrestohet. Rama po bën presion dhe është i trembur.”, u shpreh ai.
Ndërkohë, edhe deputeti i Partisë Demokratike, Belind Këlliçi, ka reaguar lidhur me hetimet e SPAK dhe masat e sigurisë të vendosura nga Gjykata e Posaçme për disa zyrtarë të AKSHI-t. Sipas Këlliçit, hetimet nuk kufizohen vetëm në raste individuale korrupsioni, por shkojnë më tej, duke prekur, sipas tij, edhe lidhje familjare me kryeministrin Edi Rama.
Në një status publik, Këlliçi shkruan se aksioni i SPAK përbën një hap të rëndësishëm, por jo të mjaftueshëm, duke theksuar se drejtësia duhet të shkojë deri në fund dhe të mos ndalet vetëm te zyrtarët teknikë.
“Vonë, por më mirë se kurrë!
SPAK mbërriti edhe në ‘kopshtin privat’ të Ramës, AKSHI me akuzën e ‘grupit të strukturuar kriminal’.
E kemi denoncuar me emra, me skema, me fakte prej kohësh, madje e ‘pluguar’ mirë qysh 10 muaj më parë nga gazetarë kurajozë. Fijet të çonin deri tek baxhanaku i kryeministrit. E patëm thënë se në këtë rast problemi nuk është thjesht korrupsioni i zakonshëm, por arkitektura e thellë e pushtetit kriminal të Edi Ramës.
Por zemra e strukturës rreh ende e qetë, me gjithë zbarkimin e SPAK në trupin e kalbur të AKSHI-t. Fakti se drejtësia mbërriti tek lidhjet familjare të kokës së (anti)sistemit, e bën edhe më të rëndësishëm këtë hap. Jo si fund, por si fillim i domosdoshëm.
Drejtësia nuk mund të mjaftohet me kurbanë ‘teknikë’, se mbetemi ende tek administrimi i dëmit. Duhet guximi për të ndalur një herë e mirë ‘gjeneratorin’ e narkoshtetit shqiptar.
Nëse ndalet tek zhurma e skajeve, ky ‘central’ kriminal do të riciklojë krimin me emra të rinj.
Krimi dhe korrupsioni qeveritar sot ka vetëm një arkitekt: ai quhet Edi Rama!”
Hetimet e SPAK për AKSHI-n vijojnë, ndërsa pritet që organet e drejtësisë të sqarojnë përgjegjësitë penale për zyrtarët dhe subjektet e përfshira në procedurat e dyshuara të prokurimit.
