Në kulmin e sezonit turistik çmimet në jug të vendit janë në “stratosferë” dhe të papërballueshme për pushuesit vendas. Ndërkohë që ditën e sotme kryeministri Edi Rama ka vënë sërish në shënjestër të kritikave të tij bizneset në jug të vendit, ku theksoi se pavarësisht kushteve që mungojnë, çmimet janë të larta.
Gjatë një takimi me kryetarë të bashkive të qarkut të Vlorës, Rama tha se më mirë të shkosh në Greqi dhe Kroaci apo Mal të Zi se sa në Dhërmi.
“Ekonomia ndikohet nga marrëzia e vendosjes së çmimeve, që e bëjnë shumë më të lehtë të shkosh në Greqi, Mal të Zi apo Kroaci se sa të rrish në Dhërmi. Vërtetë është i mrekullueshëm Dhërmiu, por jemi ende larg për të garantuar cilësi shërbimesh. ata që garantojnë të cilësi ti kenë çmime më të ulta, se sa dikush që hap një derë dhe i kërcet 200-300 euro nata, është e palogjikshme. Të shohësh hartën e frekuentimit ka kontradikta të forta përgjatë listës. Nuk është as faj as kompetenca juaj, por një rol duhet ta merrni përsipër. Lezha ka vënë një çmim tavan, pasi nuk mund të rritet çmimi i çadrave përtej tavanit. Është stërplot në Lezhë. Po të shohësh flamujt e vendeve të ndryshme që janë shtuar në grupin e turistëve në atë zonë, e kupton se gjëja duhet se ka një balancë mes asaj që ofron dhe asaj që paguan. Dua të nënvizoj nevojën për t’u fokusuar më shumë te përmbajtja e sezonit nga pikëpamja artistike. Jemi në mangësi në ofertën për fëmijët. Kjo është më evidentja”, u shpreh Rama.
