Një ngjarje e rëndë ka ndodhur pasditen e sotme në Kavajë ku një person ka tentuar të grabisë një karburant dhe gjithashtu ka rrëmbyer 2 persona. Madje njërin prej tyre e ka plagosur me thikë.
Astrit Pukameka, në afërsi të mbikalimit në rrugë dytësor ka hyrë në një pikë karburanti dhe me forca ka marrë 120 mijë lekë të reja, që ishte i gjithë fitimi i ditës. Por nuk është ndalur këtu pasi ka marrë peng edhe dy shitësit e karburantit duke i kërcënuar se do t’u vinte flakën. Në përplasje e sipër me punonjësit, plagosi me thikë Arjan Shaun, të cilin e kishte marrë peng dhe Bardhyl Petjan, duke u larguar më pas me shpejtësi me mjetin e tij. Megjithatë u kap në kohë nga Policia, e tani 45-vjeçari do të përballet me drejtësinë, duke dhënë “llogari” për kryerjen e veprave penale: “Kanosja”, “Plagosja e rëndë me dashje”, “Plagosja e lehtë me dashje”, “Vjedhja me dhunë”, “Heqja e paligjshme e lirisë” dhe “Prodhimi, mbajtja, blerja apo shitja pa leje e armëve të ftohta”.
Njoftimi i plotë i policisë së shtetit:
Kavajë/Policia parandalon një ngjarje të rëndë kriminale.
Shërbimet e Komisariatit të Policisë Kavajë pas marrjes se njoftimit se shtetasi A. P., në afërsi të mbikalimit në rrugë dytësore, ka kanosur se do digjte me benzinë dy persona, dhe ka plagosur me thikë shtetasin B. P., si dhe ka marrë peng shtetasin A. Sh. bashkë me mjetin e tij, organizuan punën me qëllim kapjen e këtij shtetasi.
Shërbimet e Policisë janë vënë në ndjekje të këtij shtetasi, i cili në fshatin Lekaj, në sheshpushimin e një karburanti, ka plagosur me thikë drejtuesin e mjetit që kishte marrë peng, shtetasin A. Sh., dhe më pas i ka marrë me forcë xhiron ditore prej 120.000 lekë të rinj, shitësit të karburantit, dhe ka kërcënuar se do të digjte karburantin.
Shërbimet e Policisë kanë arritur në kohë duke parandaluar dhe shmangur një ngjarje të rëndë kriminale me pasoja për jetën. Falë ndërhyrjes profesionale, kanë bërë të mundur neutralizimin dhe arrestimin në flagrancë të shtetasit: – A. P., 45 vjeç, për veprat penale “Kanosja”, “Plagosja e rëndë me dashje”, “Plagosja e lehtë me dashje”, “Vjedhja me dhunë”, “Heqja e paligjshme e lirisë” dhe “Prodhimi, mbajtja, blerja apo shitja pa leje e armëve të ftohta”. Materialet procedurale i kaluan Prokurorisë pranë Gjykatës së Shkallës së Parë Kavajë, për veprime të mëtejshme.
