Trupa e Cirkut Kombëtar e ndali turin artistik këtë fundjavë në Pogradec, ku sheshi “Odeon” u mbush me ritëm, ngjyra dhe emocione. Performanca u prit me entuziazëm nga publiku, duke sjellë një atmosferë festive që tërhoqi veçanërisht vëmendjen e fëmijëve.
Në skenë u ngjitën si artistët profesionistë, ashtu edhe të rinjtë e talentuar, të cilët sollën numra të ekuilibrit, elasticitetit dhe xhonglimit, duke e mbajtur publikun të mbërthyer gjatë gjithë shfaqjes.
Një ndër yjet e mbrëmjes ishte Livia Duka, një ndër anëtaret më të vogla të trupës, e cila shfaqi pasion dhe talent të rrallë për artin e cirkut.
Një tjetër moment që ngjalli emocione të veçanta ishte interpretimi i Brunilda Demollarit, trajnere dhe artiste, e cila u rikthye në skenë për të ndarë me publikun energjinë dhe dashurinë e saj për këtë art.
Cirku Kombëtar vijon turin në qytete të tjera të vendit, duke sjellë argëtim për të gjitha moshat dhe duke i dhënë jetë verës shqiptare me art dhe kreativitet.
