Interi i mjafton një pikë për kalimin në fazën e drejtpërdrejtë të Champions League, por Simone Inzaghi nuk dëshiron të mendojë për llogari të tilla përballë Monakos. Trajneri zikaltër ka për qëllim të shmangë çdo skenar të padëshiruar, ndaj pritet të hedhë në fushë formacionin më të mirë. Nga minuta e parë, pritet të zbresë edhe Asllani.
“Kemi shansin për të mbyllur këtë fazë mes tetë ekipeve të para, do të ishte një rezultat i madh, por asnjë nuk ka përfunduar. Në këtë Champions po luajmë me agresivitet, është e vërtetë që kemi bërë pak gola, por kemi pësuar vetëm një. Calhanoglu? Më shumë mundësi të jetë në dispozicion për derbin”, u shpreh Inzaghi.
Ndryshe nga Inter, Milan është i detyruar të fitojë sot përballë Dinamo Zagrebit për të shmangur fazën “play-off”.
Situata për “djallin” është më e ndërlikuar, pasi të dielën vjen derbi me Interin, por trajneri Conceiçao theksoi se nuk bën llogari.
“Nuk bëj asnjë llogari, shoh ndeshje pas ndeshje. Duhet të përqendrohemi tek takimi kundër Dinamo Zagreb, do të jetë e vështirë. Pasi fituam Superkupën, objektivi i radhës është të arrijmë mes tetë ekipeve të para në Champions. Jemi totalisht të përqendruar tek ky takim, nuk po mendojmë për derbin”, theksoi Conceiçao në konferencë për shtyp.
Pa “laps e letër” zbret në këtë sfidën të fundit të fazës së grupeve Juventus, kjo pasi “Zonja e Vjetër” është e detyruar të fitojë përballë Benfikës, por kualifikimi direkt nuk është vetëm në dorën e saj.
“Do të zbresim në fushë pa bërë llogari, luajmë vetëm për të fituar. Do të kemi përballë një skuadër të madhe, me lojtarë ekspert dhe fitues. Do të luajmë përballë publikut tonë, do të jetë një atmosferë speciale. Dëshirojmë të bëjmë një ndeshje të madhe, të dalim me fitore”, theksoi Motta në konferencë për shtyp.
