Ukraina po bën pothujse shtatë muaj luftë, ndërkohë që Rusia nuk di të ndalet në sulmet e saj.
Ndërprerjet e energjisë dhe ujit goditën shumë zona të rajonit Kharkiv të Ukrainës verilindore, ndërsa forcat ruse goditën infrastrukturën strategjike, tha guvernatori i rajonit, duke bërë kështu që sirenat e alarmit të bien në të gjithë vendin.
“Forcat pushtuese ruse goditën infrastrukturën jetike në qytetin dhe rajonin e Kharkiv”, shkroi Oleg Sinekhubov në Telegram.
“Në shumë qendra të banuara nuk ka furnizim me energji elektrike dhe ujë. Zjarret kanë shpërthyer pas këtyre sulmeve dhe shërbimet e urgjencës po merren me zjarret”, shtoi ai.
Gjithashtu, edhe këshilltari presidencial ukrainas, Mykhailo Podolyak njoftoi se bombardimet ruse që goditën infrastruktura të shumta, shkaktuan ndërprerje të gjerë të energjisë elektrike, veçanërisht në rajonet lindore
“Sulmet ruse mbi infrastrukturat kritike civile (në veçanti termocentrali më i madh në Kharkiv) janë një manifestim i terrorizmit të Federatës Ruse dhe dëshirës për të lënë civilët në masë pa energji elektrike dhe ngrohje. Një përgjigje frikacake ndaj ikjes së ushtrisë së tij nga fusha e betejës.”, shkruan këshilltari në Twitter.
Kujtojmë që një alarm ajror ka rënë në të gjithë Ukrainën. UNIAN raporton se ka pasur shpërthime veçanërisht në lindje të vendit. Nexta raporton edhe për raketat ruse të lëshuara nga Deti i Zi, duke publikuar edhe një video.
