Një ngjarje e rëndë ka ndodhur në Maqedoninë e Veriut ku një pacient me COVID-19 ka vendosur t’i jap fund jetës. Mësohet se pacienti ishte shtruar në repartin infektiv, ndërsa është hedhur nga ballkoni i spitalit në mëngjesin e sotëm. Bëhet me dije se viktima është një 70-vjeçar i cili ishte shtruar prej tri ditësh në spital për të marrë ndihmën mjekësore pasi ishte infektuar me koronavirus. Nga ekspertiza që i është bërë viktimës ka rezultuar se ai është hedhur nga ballkoni për shkak të gjendjes së rënduar psikologjike.
Ndërkohë, për rastin ka folur edhe psikologia Gentiana Mehmeti e cila ka thënë se pacientët kërkojnë të dalin nga ambiente të mbylura në momentin që i kap paniku nga vështirësitë në frymëmarrje. Sipas psikologëve pacientët në mënyrë të pavetëdijshme për të shpëtuar jetën hidhen nga dritarja ose nga ballkoni, duke shkuar drejt vdekjes.
“Kjo ka shkaktuar një gjendje mendore mjaft të rënduar tek njerëzit me pasoja shumë dimensionale psikologjike, jo vetëm fizike por edhe mendore, të tilla si stresi, frika dhe ankthi” –është shprehur psikologia Gentiana Mehmeti.
Kujtojmë që në Shqipëri ka pasur 5 raste ku pacientë me koronavirus janë hedhur nga ballkonet e spitaleve dhe i kanë dhënë fund jetës, ku më I riu ka qenë një pacient 29-vjeçar.
