Edi Rama ka zhvilluar një takim me Sekretarin amerikan të Shtetit, Michael R. Pompeo.
Ky i fundit e priti kryeministrin në Departamentin e Shtetit.
Sipas zëdhënëses Morgan Ortagus, Pompeo dhe Rama kanë diskutuar mbi përparësitë e përbashkëta gjatë kryesimit nga Shqipëria të Organizatës për Siguri dhe Bashkëpunim në Evropë.
Ndërkohë, Pompeo ka reaguar së fundmi nëpërmjet një statusi në ‘Twitter’.
Ai shkruan se është mirënjohës për partneritetin mes SHBA-ve dhe Shqipërisë, si dhe për rolin që po luan kryeministri Rama si lider në sigurinë e Ballkanit Perëndimor.
Postimi i plotë:
“I nderuar të mirëpres sot në Departamentin e shtetit, Kryeministrin e Shqipërisë Edi Rama, ku patëm një diskutim të frytshëm. Mirënjohës për partneritetin tonë të palëkundur të dhe rolin e tij të lavdërueshëm si lider sigurie në Ballkanin Perëndimor”.
Sekretari Pompeo theksoi mbështetjen e fortë të Shteteve të Bashkuara ndaj përpjekjeve të Shqipërisë për t’u anëtarësuar në Bashkimin Evropian dhe përpjekjeve të tanishme për reformën në drejtësi dhe atë zgjedhore.”
