Ditën e enjte presidenti Ilir Meta caktoi datën 13 tetor, si datën e re të zgjedhjeve. Nga ana tjetër, kryeministri Edi Rama reagoi duke u shprehur se të dielën në 30 qershor Shqipëria e shqiptarët do shkojnë në zgjedhje.
Ditën e sotme, presidenti Ilir Meta nëpërmjet një statusi në rrjetin social “Facebook”, dha një mesazh që në mëngjes, por ky mesazh është pasuar nga një tjetër mesazh.
Mesazhi i parë i tij ishte paksa thumbues ku u uroi shqiptarëve një fundjavë të qetë, ku madje u bëri edhe thirrje të rrinin sa më larg zhurmës e tensioneve.
Në mesazhin e dytë, Meta e përsërit sërish thirrjen e tij për të respektuar vendimin e gjithsecilit gjatë ditës së nesërme.
“Përsëris thirrjen time për të respektuar në mënyrë civile dhe demokratike vendimin e gjithsecilit gjatë ditës së nesërme. Sërish ju ftoj të gjithëve të silleni me qetësi dhe mençuri! Është shumë e rëndësishme vetëpërmbajtja e gjithsecilit!
E theksoj edhe njëherë rëndësinë e jashtëzakonshmë që ka nesër ruajtja e paqes sociale. Të gjithë duhet t’i shërbejmë asaj dhe së ardhmes europiane të Shqipërisë.
Shmangni provokimet që mund t’ju çojnë drejt dhunës, në mënyrë që dallimet politike të mos cënojnë bashkëjetesën qytetare në çdo familje, në çdo lagje, në çdo fshat, në çdo qytet dhe në të gjithë shoqërinë tone”, shkruan Meta në rrjetin social.
