Edhe pse dita-ditës, rastet e reja me koronavirus kanë filluar e të pakësohen, frika është ende e madhe.
Pasojat e kësaj pandemie do të jenë të dukshme për një kohë të gjatë, si në ekonomi por edhe në problemet shëndetësore që do të shfaqen te njerëzit.
Në lidhje me këtë situatë, ka folur në studion e “Abc-ja e mëngjesit” me Enkel Demin, mjeku psikioterapist, Neli Demi.
Mjeku tha se kjo ka qenë një periudhë e vështirë, ndërsa vala e pasojave të shëndetit mendor do të jenë pak më të vona se ato që ka lënë në ekonomi.
“Ka pritshmëri mbi nivelin e shtuar të problemeve psikologjike.
Vala e shëndetit mendor fillon pak më vonë se ajo e virusit. Individi ka një përparësi evolucionare për tu marrë me mbijetesën, pasi ky rrezik kalon bie në kontakt me efektet e traumës.
Kjo ka qenë një traumë me komponentë nga më të ndryshmit. Kjo ka qenë një periudhë e vështirë dhe do ketë edhe pasojat e veta. Edhe pse mund të mos jetë shumë e dukshme frika ka qenë.
Edhe individë që mund ta kenë marrë më me lehtësi në subkoshiencën e tyre kanë qenë të frikësuar nga infektimi, humbja e të ardhurave.
Pritet që kjo përpjekje e brendshme për një kohë të gjatë të japë efekte të caktuara. Kjo është një situatë e vështirë për tu menaxhuar në mënyrë individuale.
Por mënyra si menaxhohet varet shumë nga botëkuptimi i një shoqëria, nga kultura demokratike e një shoqërie”, u shpreh mjeku.
I pyetur nga gazetari edhe për lajmet që qarkullojnë në media për virusin, si 5G-ja apo mirkoçipi në vaksinë, mjeku është shprehur se duhet të ketë një lloj filtri nga ana e mediave.
“Nuk do thoja që janë lajmet që na bëjnë të fillojmë të dëgjojmë zëra.
Çdo çrregullim mendor paraprihet nga disa shenja që kanë të bëjnë me personalitetin e individit.
Personat q mund të kenë një predispozitë mund të zhvillojnë një problem mendor.
Por janë lajme që shkaktojnë ankth. Ka një rol të rëndësishëm për mënyrën se si njerëzit ndihen me fenomenin. Lajme të tilla kanë nevojë për një filtrim.
Është e rëndësishme që disa filtra të mund të vendosen edhe nga mediat.
Pavarësisht se mund të themi që mediat kanë një rol informativ, por edhe lajme të tilla është mirë të kenë një koment paraprak”, tha ai.
