Protesta e 11 është organizuar sot para Bashkisë së Tiranës nga Aleanca për Mbrotjen e Territorit (AMT) dhe forcat e opozitës, ku kërkohet dorëheqja e kryebashkiakut Erion Veliaj. Kjo vjen në pasojë të zbulimit të dy aferave të mëdha: afera “5D”, ku u arrestuan disa drejtorë të bashkisë, dhe skandali i inceneratorëve, që ka tronditur opinionin publik.
Gjatë protestës, aktori i njohur Neritan Liçaj ka kritikuar ashpër veprimet e bashkisë dhe të afërmve të saj me biznesin privat. “Çfarë bëri Cjapi i Surrelit?! Cjapi i Surrelit do të marrë tokën e dhuruar nga rilindasit e vërtetë për të pasuruar veten e vet! Domethënë, në qoftë se rilindasit e vërtetë shqiptarë u përpoqën dhe shkrinë pasuritë e tyre familjare për të bërë këtë komb, të vjen Cjapi i Surrelit me këtë ‘qitësin’ e vogël dhe vjedh pasuritë tona kombëtare për të pasuruar firmën Fusha,” tha Liçaj në fjalimin e tij.
Liçaj shtoi se është e habitshme si biznesmeni Fusha vazhdon të përfitojë nga marrëveshjet me bashkinë, duke nënvizuar mungesën e moralit dhe integritetit. “A është ndonjëçikë tirans?! A është një çik shqiptar?! Se është turp ta marrë atë për të bërë biznes. Ka një limit! Ka një kufi çdo gjë,” shtoi aktori.
Protesta vijoi me thirrje për ndryshime të thella në menaxhimin e qytetit dhe në përmirësimin e transparencës dhe llogaridhënies së institucioneve publike. Demonstruesit u zotuan të vazhdojnë presionin deri në realizimin e kërkesave të tyre për drejtësi dhe përgjegjësi.
