Formulari që qarkulloi ditën e djeshme nga Pastori Akil Pano i cili postoi një formular që plotësohet nga fëmijët në kopshtet e Tiranës dhe në vend të fjalës ‘nëna’ e ‘babai’ është shënuar ‘Prindi 1’ e ‘Prindi 2’ sipas bashkisë rezulton i pavërtetë.
Në një postim në Facebook, Pano shkruan se kjo gjë është bërë pa dijeninë e prindërve dhe se është në shkelje të plotë të ligjit. Pastori iu bën thirrje Ministrisë së Arsimit, drejtorive të shkollave e institucioneve të arsimit të tërheqin menjëherë nga qarkullimi këtë formular, që është shpërndarë nga komuniteti LGBTI, të cilët e kërkuan para pak muajsh zëvendësimin e fjalës ‘nënë’.
Denoncimi: Ky formular është shpërndarë në kopshtet e fëmijëve, sapo ma dërguan. Në shkelje të plotë të ligjit mbi kodin e familjes emri MAMI dhe BABI vendosen në kllapa dhe zëvendësohen me Prindi 1 dhe Prindi 2.
Agjenda Gay ka nisur zbatimin, qetësisht dhe në shkelje me Kodin e Familjes që është në fuqi në Shqipëri. Ky lloj imponimi është dhunë dhe është diktatura e minorancës mbi shumicën. I bëj thirrje: Ministrisë së Arsimit, Drejtorisë Arsimore, Drejtorive të Shkollave dhe Institucioneve të Edukimit Parashkollor, të tërheqin menjëherë nga përdorimi këtë formular, i cili është ne shkelje me ligjin dhe kodin e familjes dhe fyen pjesën me te madhe të shqiptarëve.
Bashkia e Tiranës reagoi sot duke thënë se ky lajm për regjistrimin në kopshtet dhe çerdhet e Tiranës është i pavërtetë.
Sipas Bashkisë së Tiranës, në formularët zyrtarë që përdoren për regjistrimin e fëmijëve në çerdhe dhe kopshte nuk përdoren terma të tillë dhe lajmi i qarkulluar është “fake news”.
Gjatë njoftimit thuhet se formularët që përdoren nga ky institucion shoqërohen me logon zyrtare të bashkisë së Tiranës.
