Prokuroria e Posaçme ka vendosur të zgjasë hetimet deri në tetor ndaj presidentit të Partisë së Lirisë, Ilir Meta, dhe ish-bashkëshortes së tij, Monika Kryemadhi, lidhur me dosjen e lobimit në SHBA dhe çështjen CEZ-DIA.
Sot, Kryemadhi është thirrur për t’u marrë në pyetje në cilësinë e të pandehurës nga prokurorët e posaçëm.
“Hetimet janë shtyrë deri në tetor. Do të shohim çfarë do të ndodhë sot dhe do t’ju informojmë,” u shpreh Kryemadhi.
Ilir Meta u arrestua më 21 tetor 2024. Ai dhe Kryemadhi dyshohen se, në bashkëpunim me njëri-tjetrin dhe zyrtarë të tjerë shtetërorë, gjatë 15 viteve të fundit kanë shfrytëzuar pozicionet e tyre politike dhe shtetërore për të favorizuar kompani private.
Hetimet përfshijnë veprime të ndryshme, përfshirë lobime në SHBA dhe shitblerje banesash, në këmbim të përfitimeve financiare të konsiderueshme, të cilat sipas akuzave janë fshehur duke mos u deklaruar në ILDKPI dhe KQZ.
Monika Kryemadhi po hetohet nga SPAK për tre akuza, pastrim parash, korrupsion dhe mosdeklarim të ardhurash.
Më 23 tetor, Gjykata vendosi të mbajë në fuqi masën “detyrim për t’u paraqitur në policinë gjyqësore” ndaj saj, si dhe ndaj Ema Çokut, e hetuar gjithashtu për pastrim parash.
Ndërkaq, ndaj Piro Xhixhos, i cili po hetohet për korrupsion pasiv, masa e sigurisë u ndryshua nga “arrest në shtëpi” në “detyrim për t’u paraqitur në policinë gjyqësore”.
Të tre të hetuarit duhet të paraqiten një herë në muaj në zyrat e Policisë Gjyqësore të SPAK, sipas masës së sigurisë “detyrim paraqitje”.
