Ditën e sotme është duke u zhvilluar seanca e radhës për çështjen e shumëpërfolur “Babale”.
Në sallën e gjyqit janë lexuar edhe deklarimet e Agron Xhafajt, vëllait të ish-ministrit të Brendshëm, Fatmir Xhafaj, shkruan Faxweb.
Xhafaj ka deklaruar se gjithçka është një skemë e ngritur, për të goditur vëllanë e tij për shkak të postit që mban.
Më tej ai ka zbuluar se Albert Veliu, ose i ashtuquajturi “Babalja”, i ka kërkuar lekë për të luajtur bixhoz.
Agron Xhafaj gjithashtu ka mohuar të ketë lënë takim me Veliun.
Në lidhje me audiopërgjimin e publikuar nga PD-ja, vëllai i ish-ministrit ka thënë se nuk është e folura e tij, pasi ka vështirësi në shqiptimin e disa shkronjave.
“Paraditen e datës 4 Maj 2018 tre deputetët e PD kanë bërë një denoncim me të dhëna të rreme për të goditur vëllain tim. Dua të sqaroj që është e vërtetë që unë përdor nr me …472. Aty më telefonojnë të gjithë, ata që më duan dhe të kundërtën. Në biseden e publikuar dyshoj se është Albert Veliu. Ai disa herë më kërkonte para se luante bixhoz. Unë nuk e kam takuar atë njeri. Sa herë më merrte për lekë e kam refuzuar dhe në fund i kam bërë bllok. Nuk është i vërtetë fakti që unë të kem lënë takim me të. Në lidhje me bisedën e pretenduar në lokalin tim, aty jam unë. Ajo nuk është e folura ime, për më tepër që unë kam probleme në shqiptimin e fisa shkronjave. Është tërësisht e manipuluar. Nuk njoh askënd me emrin Ermal, vec një kushëririt tim. Po ashtu, nuk njoh asnjë person me nofkën Toto Qorri”, ka deklaruar Xhafaj.
