Ditën e sotme, 18 shtator, nis censi i Populllsisë dhe Banesave.
Ndërkohë që pas thirrjes së Kishës Ortodokse dhe të Komunitetit Mysliman të Shqiptarëve, vazhdon fushatën “fetare” edhe Kisha Katolike.
Presidenti i Konferencës Ipeshkvore të Shqipërisë Imzot Angelo Massafra i është drejtuar me një mesazh besimtarëve katolikë në prag të nisjes së regjistrimit të popullsisë. Ai iu bën thirrje atyre që të deklarojnë besimin e tyre fetar duke evidentuar pyetjet përkatëse brenda formularit të censit.
“Ne ju inkurajojmë që ta kryeni detyrën tuaj si qytetarë të vendit ndaj Institucioneve duke iu përgjigjur pyetësorit. Gjithashtu, duam të tërheqim vëmendjen tuaj ndaj pyetjeve rreth besimit fetar dhe fesë, të cilat mbajnë përkatësisht nr. 168 dhe nr. 169 të pyetësorit brenda Modulit I me titull Informacion individual.
Detyrimi i përgjithshëm për t’u përgjigjur rreth atyre pyetjeve ka edhe opsionin: “Unë preferoj të mos përgjigjem”, pasi është një e drejtë e secilit. Ne si ipeshkvij jemi të bindur se një besimtar njihet nga frytet e jetës së tij dhe jo vetëm nga një pohim rreth përkatësisë së tij fetare”, shprehet Imzot Angelo Massafra.
Ndërkohë që duhet të theksojmë që këto thirrje që kërkojnë identifikimin e qytetarëve nëpërmjet fesë nuk janë aspak të arsyeshme në një kohë kur theksi vendoset tek identiteti kombëtar.
Mund të themi se lufta prej vitesh e shteteve që janë fqinj e Shqipërisë, për të tërhequr minoritetet nëpërmjet feve, vazhdon dhe nuk ka ndërmend të ndalojë.
