Ditën e sotme, Bashkimi Europian i ka dhënë dritën jeshile Shqipërisë dhe Maqedonisë së Veriut për të nisur bisedimet për anëtarësim në union.
Por nëse për Maqedoninë e Veriut nuk ka kushte, për vendin tonë janë disa ‘detyra shtëpie’ që duhen përmbushur.
Së fundmi, zëvendës kryetari i i Grupit Parlamentar CDU/CSU, Johann Wadephul në Bundestagun gjerman ka reaguar rreth hapjes së negociatave, duke e cilësuar si një sinjal shprese dhe inkurajimi për qytetarët.
Po nga ana tjetër deputeti gjerman deklaron se vendimi i Këshillit të Ministrave është edhe një deklaratë mosbesimi ndaj Komisionit Europian, i cili kishte propozuar që negociatat me Shqipërinë të nisin pa kushte.
Për Wadephul fakti që vendet anëtare sot kanë vendosur 15 kushte deshmon se ato presin që Komisioni Europian të monitorojë progresin në mënyrë më strikte dhe me më shumë kujdes.
“Vendimi i sotëm i Këshillit të Ministrave të Bashkimit Europian konfirmon perspektivën europiane të Maqedonisë së Veriut dhe Shqipërisë. Ky është një sinjal inkurajimi dhe shprese për qytetarët, sidomos në këto kohë të vështira të krizës së koronavirusit, e cila i ka prekur të dyja këto vende në shkallë të konsiderueshme.
Në të njëjtën kohë, vendimi i Këshillit të Ministrave është një deklaratë mosbesimi ndaj Komisionit Europian. Ky i fundit kishte propozuar që negociatat me Shqipërinë të nisin pa kushte. Fakti që vendet anëtare sot kanë vendosur 15 kushte dëshmon se ato presin që Komisioni Europian të monitorojë progresin në mënyrë më strikte dhe me më shumë kujdes. Kjo vlen për përmbushjen e 15 parakushteve si edhe për të gjithë procesin e negociatave. Ne jemi të bindur se Komisioni i ri Europian nën drejtimin e Presidentes Ursula von der Leyen do ta marrë këtë parasysh. Grupi parlamentar CDU/CSU bashkë me gjithë partnerët e tij Europianë, do të jetë i palëkundur derisa 15 parakushtet të përmbushen plotësisht përpara se të nisin negociatat e pranimit me Shqipërinë”, është ky reagimi i Wadephul.
